ਇੰਟਰਨੈਸ਼ਨਲ ਨਿਊਜ. ਮਿਆਂਮਾਰ ਵਿੱਚ ਹਾਲ ਹੀ ਵਿਚ ਆਏ 7.7 ਤੀਬਰਤਾ ਵਾਲੇ ਭੂਚਾਲ ਤੋਂ ਬਾਅਦ ਰਾਹਤ ਕਾਰਜ ਜਾਰੀ ਹਨ। ਹੁਣ ਇਨ੍ਹਾਂ ਰਾਹਤ ਕੰਮਾਂ ਵਿੱਚ ਇੱਕ ਖਾਸ ਤਕਨੀਕ ਦਾ ਇਸਤੇਮਾਲ ਕੀਤਾ ਜਾ ਰਿਹਾ ਹੈ। ਸਿੰਗਾਪੁਰ ਦੀ ਹੋਮ ਟੀਮ ਸਾਇੰਸ ਐਂਡ ਟੈਕਨੋਲੋਜੀ (HTX) ਨੇ ਨਾਨਯਾਂਗ ਟੈਕਨੋਲੋਜੀ ਯੂਨੀਵਰਸਿਟੀ ਅਤੇ ਕਲਾਸ ਇੰਜੀਨੀਅਰਿੰਗ ਐਂਡ ਸੋਲਿਊਸ਼ਨਜ਼ ਨਾਲ ਮਿਲ ਕੇ ਇੱਕ ‘ਸਾਈਬੌਰਗ ਕਾਕਰੋਚ’ ਤਿਆਰ ਕੀਤਾ ਹੈ। ਇਹ ਰੋਬੋਟਿਕ ਕੀੜੇ ਇਨਫ੍ਰਾਰੈਡ ਸੈਂਸਰ ਅਤੇ ਕੈਮਰੇ ਨਾਲ ਲੈਸ ਹਨ, ਜੋ ਮਲਬੇ ਹੇਠ ਫੰਸੇ ਲੋਕਾਂ ਦੀ ਖੋਜ ਕਰਨ ਵਿੱਚ ਰਾਹਤ ਟੀਮ ਦੀ ਮਦਦ ਕਰਨਗੇ। ਪਹਿਲੀ ਵਾਰ ਇਨ੍ਹਾਂ ਦੀ ਵਰਤੋਂ ਮਿਆਨਮਾਰ ਦੇ ਨੇਪੀਡੌ ਅਤੇ ਮਾਂਡਲੇ ਖੇਤਰ ਵਿੱਚ ਕੀਤੀ ਜਾ ਰਹੀ ਹੈ। HTX ਨੇ 10 ਰੋਬੋਟਿਕ ਹਾਈਬ੍ਰਿਡ ਕੀੜੇ ਤਿਆਰ ਕੀਤੇ ਹਨ।
ਜਿੱਥੇ ਇਨਸਾਨ ਨਹੀਂ ਪਹੁੰਚ ਸਕਦੇ, ਉਥੇ ਪਹੁੰਚਣਗੇ ਇਹ ਰੋਬੋਟ
ਇਹ ਸਾਈਬੌਰਗ ਕਾਕਰੋਚ ਉਹਨਾਂ ਥਾਵਾਂ ਨੂੰ ਸਕੈਨ ਕਰਨਗੇ ਜਿੱਥੇ ਰਾਹਤ ਟੀਮ ਲਈ ਪਹੁੰਚਣਾ ਔਖਾ ਹੈ। ਇਹ ਕੀੜੇ ਮਲਬੇ ਅਤੇ ਸੰਗੜੀਆਂ ਥਾਵਾਂ ਵਿਚੋਂ ਆਸਾਨੀ ਨਾਲ ਲੰਘ ਸਕਦੇ ਹਨ। HTX ਦੇ ਰੋਬੋਟਿਕ ਸੈਂਟਰ ਦੇ ਅਧਿਕਾਰੀ ਨੇ ਕਿਹਾ ਕਿ ਇਹ ਇਲਾਕੇ ਵਿਚ ਪਹਿਲੀ ਵਾਰ ਇਨ੍ਹਾਂ ਹਾਈਬ੍ਰਿਡ ਕੀਟਾਂ ਦੀ ਵਰਤੋਂ ਕੀਤੀ ਜਾ ਰਹੀ ਹੈ।
ਚੁਣੌਤੀਆਂ ਦਾ ਸਾਹਮਣਾ
HTX ਦੀ ਟੀਮ ਨੇ ਦੱਸਿਆ ਕਿ ਮਲਬੇ ਹੇਠ ਫੰਸੇ ਲੋਕਾਂ ਤੋਂ ਮਿਲੀ ਜਾਣਕਾਰੀ ਉਨ੍ਹਾਂ ਨੂੰ ਇਹ ਤਕਨੀਕ ਵਿਕਸਤ ਕਰਨ ਲਈ ਪ੍ਰੇਰਨਾ ਬਣੀ। ਹਾਲਾਤ ਚਾਹੇ ਕਿੰਨੇ ਵੀ ਮੁਸ਼ਕਿਲ ਹੋਣ, ਟੀਮ ਲੋਕਾਂ ਦੀ ਮਦਦ ਲਈ ਤਿਆਰ ਹੈ।
ਸਮੇਂ ਤੋਂ ਪਹਿਲਾਂ ਹੋਈ ਵਰਤੋਂ
ਇੰਜੀਨੀਅਰਾਂ ਮੁਤਾਬਕ, ਇਹ ਸਾਈਬੌਰਗ ਕੀੜੇ ਆਮ ਤੌਰ ‘ਤੇ 2026 ਤੋਂ ਮੈਦਾਨ ਵਿੱਚ ਲਿਆਂਦੇ ਜਾਣੇ ਸੀ, ਪਰ ਮਿਆਨਮਾਰ ਦੇ ਭੂਚਾਲ ਕਾਰਨ ਇਹਨਾਂ ਨੂੰ ਸਮੇਂ ਤੋਂ ਪਹਿਲਾਂ ਹੀ ਵਰਤਣਾ ਪਿਆ। ਹਾਲਾਂਕਿ ਹੁਣ ਤੱਕ ਇਨ੍ਹਾਂ ਰੋਬੋਟਾਂ ਨੂੰ ਮਲਬੇ ਹੇਠ ਲੋਕ ਨਹੀਂ ਮਿਲੇ, ਪਰ ਸੰਕੁਚਿਤ ਥਾਵਾਂ ਨੂੰ ਸਕੈਨ ਕਰਨ ਵਿੱਚ ਇਹ ਬਹੁਤ ਮਦਦਗਾਰ ਸਾਬਤ ਹੋ ਰਹੇ ਹਨ।
