ਆਈਪੀਐਲ 2025 ਦੀ ਸ਼ੁਰੂਆਤ 22 ਮਾਰਚ ਨੂੰ ਈਡਨ ਗਾਰਡਨ ਵਿਖੇ ਮੌਜੂਦਾ ਚੈਂਪੀਅਨ ਕੋਲਕਾਤਾ ਨਾਈਟ ਰਾਈਡਰਜ਼ ਅਤੇ ਰਾਇਲ ਚੈਲੇਂਜਰਜ਼ ਬੰਗਲੌਰ ਵਿਚਕਾਰ ਮੈਚ ਨਾਲ ਹੋਵੇਗੀ, ਜਦੋਂ ਕਿ ਫਾਈਨਲ ਵੀ 25 ਮਈ ਨੂੰ ਉਸੇ ਮੈਦਾਨ ‘ਤੇ ਖੇਡਿਆ ਜਾਵੇਗਾ। ਇਸ ਸਾਲ ਵੀ ਕੁਝ ਆਈਪੀਐਲ ਮੈਚ ਧਰਮਸ਼ਾਲਾ ਅਤੇ ਗੁਹਾਟੀ ਵਿੱਚ ਖੇਡੇ ਜਾਣਗੇ। ਮੁੱਲਾਂਪੁਰ ਤੋਂ ਬਾਅਦ, ਧਰਮਸ਼ਾਲਾ ਪੰਜਾਬ ਕਿੰਗਜ਼ ਦਾ ਦੂਜਾ ਘਰੇਲੂ ਮੈਦਾਨ ਹੈ, ਜਦੋਂ ਕਿ ਰਾਜਸਥਾਨ ਰਾਇਲਜ਼ ਜੈਪੁਰ ਤੋਂ ਇਲਾਵਾ ਗੁਹਾਟੀ ਵਿੱਚ ਮੈਚ ਖੇਡਦੀ ਹੈ।
ਬੀਸੀਸੀਆਈ ਨੇ ਅਜੇ ਸ਼ਡਿਊਲ ਜਾਰੀ ਨਹੀਂ ਕੀਤਾ ਹੈ ਪਰ ਪੂਰਾ ਸ਼ਡਿਊਲ ਅਗਲੇ ਹਫ਼ਤੇ ਦੇ ਸ਼ੁਰੂ ਵਿੱਚ ਆਉਣ ਦੀ ਉਮੀਦ ਹੈ। ਪੰਜ ਵਾਰ ਦੀ ਚੈਂਪੀਅਨ ਚੇਨਈ ਸੁਪਰ ਕਿੰਗਜ਼ ਆਈਪੀਐਲ 2025 ਵਿੱਚ ਆਪਣੀ ਮੁਹਿੰਮ ਦੀ ਸ਼ੁਰੂਆਤ 23 ਮਾਰਚ ਨੂੰ ਐਮਏ ਚਿਦੰਬਰਮ ਸਟੇਡੀਅਮ ਵਿੱਚ ਮੁੰਬਈ ਇੰਡੀਅਨਜ਼ ਵਿਰੁੱਧ ਕਰੇਗੀ।
ਚੇਨਈ ਦੀ ਅਗਵਾਈ ਰੁਤੁਰਾਜ ਗਾਇਕਵਾੜ ਕਰਨਗੇ ਜਦੋਂ ਕਿ ਮੁੰਬਈ ਦੀ ਕਪਤਾਨੀ ਹਾਰਦਿਕ ਪੰਡਯਾ ਕਰਨਗੇ। ਸ਼੍ਰੇਅਸ ਅਈਅਰ ਦੇ ਪੰਜਾਬ ਕਿੰਗਜ਼ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ, ਕੇਕੇਆਰ ਨੇ ਅਜੇ ਤੱਕ ਕਪਤਾਨ ਦਾ ਐਲਾਨ ਨਹੀਂ ਕੀਤਾ ਹੈ। ਆਰਸੀਬੀ ਦੀ ਕਮਾਨ ਫਾਫ ਡੂ ਪਲੇਸਿਸ ਦੀ ਬਜਾਏ ਰਜਤ ਪਾਟੀਦਾਰ ਦੇ ਹੱਥਾਂ ਵਿੱਚ ਹੋਵੇਗੀ।
ਆਰਸੀਬੀ ਵਿਰੁੱਧ ਕੇਕੇਆਰ ਦਾ ਦਬਦਬਾ
ਪਿਛਲੇ ਸਾਲ, ਆਰਸੀਬੀ ਲੀਗ ਪੜਾਅ ਵਿੱਚ ਚੌਥੇ ਸਥਾਨ ‘ਤੇ ਰਿਹਾ ਸੀ। ਆਰਸੀਬੀ ਨੇ ਪਹਿਲੇ ਛੇ ਮੈਚ ਲਗਾਤਾਰ ਹਾਰਨ ਤੋਂ ਬਾਅਦ ਛੇ ਜਿੱਤਾਂ ਨਾਲ ਪਲੇਆਫ ਵਿੱਚ ਜਗ੍ਹਾ ਬਣਾਈ, ਪਰ ਉਹ ਐਲੀਮੀਨੇਟਰ ਹਾਰ ਗਿਆ। ਕੋਲਕਾਤਾ ਵਿੱਚ RCB ਦੇ ਖਿਲਾਫ KKR ਦਾ ਦਬਦਬਾ ਰਿਹਾ ਹੈ, ਉਸਨੇ ਈਡਨ ਗਾਰਡਨ ਵਿੱਚ ਆਪਣੇ 12 ਮੈਚਾਂ ਵਿੱਚੋਂ ਅੱਠ ਜਿੱਤੇ ਹਨ। ਪੀਬੀਕੇਐਸ, ਜਿਸ ਕੋਲ ਸ਼੍ਰੇਅਸ ਅਤੇ ਰਿੱਕੀ ਪੋਂਟਿੰਗ ਦੇ ਰੂਪ ਵਿੱਚ ਇੱਕ ਨਵਾਂ ਕਪਤਾਨ ਅਤੇ ਕੋਚ ਹੈ, ਧਰਮਸ਼ਾਲਾ ਵਿੱਚ ਆਪਣੇ ਤਿੰਨ ਘਰੇਲੂ ਮੈਚ ਖੇਡਣਗੇ। ਹਿਮਾਚਲ ਪ੍ਰਦੇਸ਼ ਦੇ ਸੁੰਦਰ ਮੈਦਾਨਾਂ ‘ਤੇ ਹਰ ਸੀਜ਼ਨ ਵਿੱਚ ਖੇਡੇ ਜਾਣ ਵਾਲੇ ਦੋ ਮੈਚਾਂ ਨਾਲੋਂ ਇੱਕ ਵੱਧ। ਉਨ੍ਹਾਂ ਦੇ ਬਾਕੀ ਚਾਰ ਘਰੇਲੂ ਮੈਚ ਮੁੱਲਾਂਪੁਰ, ਪੰਜਾਬ ਵਿੱਚ ਖੇਡੇ ਜਾਣਗੇ।